கோதுமை மாவு பிஸ்கட்/ தெக்குஆ பிஸ்கட் / காஜூர்
தேவையான பொருள்கள் :
கோதுமை மாவு : 1 கப்
பொடித்த சர்க்கரை : 1/4 கப்
டெஸிகேடட் தேங்காய் : 2 மேஜைக்கரண்டி
ரவை : 2 மேஜைக்கரண்டி
நெய் : 2 தேக்கரண்டி
ஏலக்காய் பொடி : ஒரு சிட்டிகை
தண்ணீர் : தேவையான அளவு
எண்ணெய் : பொரிப்பதற்கு
செய்முறை :
ஒரு பாத்திரத்தில் மாவு, பொடித்த சர்க்கரை,டெஸிகேடட் தேங்காய், ஏலக்காய் பொடி, ரவை மற்றும் நெய்சேர்த்து கைகளால் நன்றாக கலந்து கொள்ளவும்.
மாவினை கைகளால் கொழுக்கட்டை மாதிரி பிடித்தால், பிடிக்க வர வேண்டும்.
பின்னர் சிறிது சிறிதாக தண்ணீர் சேர்த்து சப்பாத்தி மாவு பதத்திற்கு பிசைந்து கொள்ளவும்.
பின்னர் இந்த மாவினை உருண்டைகளாக உருட்டி, ஒரு முள்கரண்டி வைத்து விருப்பமான டிசைன் செய்து, அந்த பிஸ்கட்டுகளை மிதமான சூட்டில், எண்ணெய்யில் பொரித்து எடுத்தால் சுவையான கோதுமை மாவுபிஸ்கட்டுகள்/ தெக்குஆ/ காஜுர் தயார்.
குறிப்புகள் :
கோதுமை மாவிற்கு பதிலாக மைதா மாவிலும் தயாரிக்கலாம்.
விருப்பப்பட்டால் , ஒரு தேக்கரண்டி பொடித்த சோம்பு மாவில் சேர்த்துக்கொள்ளலாம்.
ஒரு கப் கோதுமை மாவிற்கு, கால் கப் பொடித்த சர்க்கரை சேர்க்கும் பொது இனிப்பு மிகவும் அளவாக இருக்கும். தங்களுக்கு இன்னும் சிறிது இனிப்பாக வேண்டுமென்றால், 1 கப் மாவிற்கு 1/3 கப் பொடித்த சர்க்கரைசேர்த்துக்கொள்ளலாம்.
சர்க்கரைக்கு பதிலாக பொடித்த வெல்லம் சேர்த்தும் இதே பிஸ்கட்டுகளை தயாரிக்கலாம்.
எண்ணெய்யில் இருந்து பொரித்து வெளியில் எடுக்கும் பொழுது மிகவும் மிருதுவாக (அதிரசம் மாதிரி மிருதுவாக) இருக்கும். ஆனால், சூடு குறையும் பொழுது, பிஸ்கட்டுகள் மொறுமொறுவென்று ஆகிவிடும்.
இந்த மாவினை சப்பாத்திகளாக தேய்த்து , ஒரு பிஸ்சா கட்டர் / குக்கீ கட்டர் / கத்தி வைத்து விருப்பமானவடிவத்தில் வெட்டி எடுத்து அதனையும் எண்ணெய்யில் பொரித்து இதே முறையில் பிஸ்கட்டுகள்தயாரிக்கலாம்.
இது ஒரு பாரம்பரியமான பிஹாரி பிஸ்கட் ரெசிபி.
No comments:
Post a Comment